Kwa mujibu wa ripoti ya Idara ya tarjama ya Shirika la Habari la Hawza, hafla ya kuwaenzi mashahidi wawili, “Ali Ibrahim Shaeeto” na “Bilal Muhammad Shaeeto”, iliyoandaliwa na Hizbullah katika Kituo cha Imam Hassan al-Mujtaba (a.s) kilichopo katika mtaa wa San-Teriz, ilishuhudiwa na viongozi mbalimbali akiwemo Hassan Fadhlallah, mwakilishi wa eneo la Beirut Hizbullah, Mahmoud Qamati, mjumbe wa Baraza la Kisiasa la Hizbullah na waziri wa zamani, pamoja na kundi la wanazuoni, watu mashuhuri, familia za mashahidi na wananchi.
Hassan Fadlallah, mjumbe wa Kundi la Wabunge wa “muqawama” nchini Lebanon, amesema kuwa hadi sasa hakuna mpango wowote wa kweli wa kisiasa uliowekwa wa kuzuia uvamizi wa utawala wa Kizayuni dhidi ya Lebanon, na kwamba Lebanon kwa sasa haina chochote zaidi ya makubaliano ambayo sasa yametimiza mwaka mmoja. Licha ya ukiukaji na hujuma zote za Israel tangu mwaka uliopita hadi leo, hakuna nafasi ya kujadili suala lolote jipya kabla ya makubaliano hayo kutekelezwa kikamilifu.
Ameongeza: Kile kinachowekwa leo mbele ya Lebanon ni aidha kuendelea kwa mauaji na mashambulizi, au kujisalimisha kikamilifu mbele ya adui. Na yote ambayo serikali ya Lebanon imetoa kama makubaliano na maridhiano, hayajaafikiwa na serikali ya adui, kwa sababu wao wanataka nchi yetu ijisalimishe. Ni kweli kwamba sisi hatutafuti vita, lakini kwa uwazi na kusema kweli tunatangaza kuwa hatutajisalimisha kamwe mbele ya adui huyu, wala hatutaruhusu Lebanon ijisalimishe kwake, hata kama itagharimu gharama kubwa na kujitoa mhanga zaidi.
Fadlallah amesisitiza: Tupo katika hatua ngumu na nyeti sana, lakini hii haimaanishi kuwa tujisalimishe mbele ya mauaji, uvamizi na changamoto za adui, wala kuifanya nchi yetu kuwa chakula tayari mdomoni mwa adui. Adui huyu anataka kila kitu. Tunajua kuwa hali ya wananchi ni ngumu na wana wasiwasi mwingi, lakini katika historia yetu tumepitia matatizo mengi, na hakuna hata moja lililodumu milele. Wananchi wa nchi hii waliendelea kubaki, nasi pia pamoja na mauaji yote anayoyafanya adui, bado tunabaki tumeishikamana na ardhi yetu.
Mjumbe wa Kambi ya muqawama amesema: Miongoni mwa wananchi wetu kuna swali halali na la dharura: Je, tutaikabili vipi misururu hii ya mashambulizi ya Israel? Hizbullah itachukua hatua gani? Je, tunaweza kurejea kwenye mizania ya awali? Na ni vipi tunaweza kuilinda nchi, taifa, vijana wetu, ardhi yetu na vijiji vyetu dhidi ya mauaji na ugaidi vinavyofanywa na adui — ambapo tukio la hivi karibuni ni uhalifu wa huko Dhahiya Kusini dhidi ya makamanda wa muqawama, vijana na raia wasio na hatia?
Akaendelea kusema: Hivyo basi, jambo kuu linaloishughulisha harakati ya muqawama leo ni namna ya kukabiliana na changamoto hii kubwa, hatari na yenye mustakabali wa hatima kwa nchi na taifa. Hili ni suala linalojadiliwa kila siku bila kukoma. Hali ya ndani na ya kikanda imetofautiana na ile ya kabla ya vita vya msaada na operesheni ya “Uli al-Ba’s”, na mizania iliyowekwa tangu mwaka 1996 kwa ajili ya kulinda raia, kisha ikaendelea mwaka 2000, 2006 hadi 2024, sasa imebadilika. Hatuikatai hali halisi, tunajua kuwa tumeingia katika hatua mpya, ambayo inahitaji utendaji mpya, kazi mpya na kufafanua upya mizania mpya ya kukabiliana na mashinikizo haya.
Hassan Fadhlallah amesema: Katika kipindi hiki cha sasa, licha ya maumivu yote, na kwa kusimamia msimamo uliotangazwa tarehe 27 Novemba 2024, serikali kwa taasisi zake zote inawajibika kwenye kulinda mamlaka ya taifa. Tunaposema serikali, tunakusudia Lebanon nzima na vipengele vyake vyote. Hata kama baadhi wanauliza: ni serikali ipi hiyo na iko wapi?, bado tunaendelea kuihimiza ichukue msimamo sahihi.
Serikali ina chaguo nyingi ikiwa itaamua kuwa serikali inayowajibika kwa wananchi wake. Inapaswa kutumia nguvu zote za kidiplomasia, kisiasa na za habari, kwa sababu ina uwezo wa kuleta shinikizo.
Akaongeza: “Wale wanaodhani kuwa maumivu na mateso yatabaki Kusini pekee, au kuwa ni mazingira ya muqawama tu yatakayobeba gharama huku maeneo mengine yakibaki salama, wanakosea. Athari na matokeo ya uvamizi yataikumba Lebanon yote.”
Mjumbe wa Kambi ya muqawama ameongeza: Uzoefu wetu tangu mwaka 1982 unaonesha kuwa kila wakati mradi wa Israel unapodhoofika, wale wale ambao leo wamejitokeza Lebanon kutoka kwenye maficho yao ili kulishambulia taifa letu na mazingira yetu, hurudi tena kwenye maficho yao — kama walivyotoweka baada ya 1982. Hao ni watu wale wale, hawajabadilika, na historia yao ni nyeusi. Hawana chochote cha kuipatia Lebanon isipokuwa lugha ya chuki na uchochezi.
Mwishoni Fadhlallah amesema: Iwapo watu hawa kwa kweli wanadai kuwa wao ndio wawakilishi wa wengi kwa wananchi wa Lebanon, basi wakubali kufanyika uchaguzi bila masharti ya kibaguzi ya kidhehebu, ili tuone ni nani kweli anayewakilisha wananchi. Ukweli ni kwamba wao si wawakilishi wa wengi wa wananchi wa Lebanon, na hata kwa mizania na vigezo vya sasa, sisi na washirika wetu tunawakilisha zaidi ya nusu ya taifa la Lebanon, na hili litaonekana wazi katika uchaguzi ujao.
Maoni yako